LAOAG CITY — Inbatad ni Department of Agriculture (DA) Secretary Domingo Panganiban a posible pay laeng a bumaba ti presio ti bagas iti P20 kada kilo iti laksid dagiti karit a sangsanguen ti sektor ti agrikultura.
Iti statement ni Panganiban, kinunana nga agtultuloy dagiti addang ti gobierno a mangpababa iti presio ti bagas.
Karaman ditoy ti panangpapigsa iti lokal a produksion ken panangipaay iti tulong kadagiti mannalon.
Innayonna a makatulong ti panangipamaysa kadagiti gannuat kas iti subsidy, technical support, ken training programs tapno mapaadu ti apit ken nababbaba ti gastos iti produksion.
Dinakamat pay ni Panganiban a ti panagangkat iti bagas ket agtultuloy a mangpennek iti kinakurang ti suplay ken maliklikan ti kellaat a panagngato ti presio.
Segun kenkuana, tulbek ti balanse ti importasion ken lokal nga apit tapno mataginayon ti makabael a presio ti bagas iti merkado.
