LAOAG CITY – Impalgak ni Sen. Sherwin Gatchalian a dumanon iti P300,000 ti baybayadan dagiti Chinese nationals no kalikagomda ti mangala ti legal wenno valid a birth certificate ditoy Pilipinas.
Kunana a karaman iti P300,000 ti bayad ti pasaporte ken driver’s license.
Immuna iti daytoy, impalgak ti National Bureau of Investigation (NBI) a 200 a palsipikado a birth certificates ti naited kadagiti Chinese nationals manipud 2018 agingga 2019 idiay Santa Cruz, Davao del Sur.
Madanagan ni Gatchalian iti nasao a natakuatan, nangruna idi naipalgak a ti mapapati a Chinese national, a ni Alice Guo ti Bamban, Tarlac, ken nabutosan a kas Mayor.
Kunana a nalawag nga adda sindikato nga aktibo nga aggargaraw para iti pannakaipaulog dagiti valid a dokumento ti Pilipinas kadagiti Intsik.
Inbatad na pay a posible nga adda dagiti mapagtalkan nga indibidwal iti Philippine Statistics Authority (PSA) iti lokal a gobyerno ti Santa Cruz a karaman iti daytoy nga iligal nga aktibidad.
