LAOAG CITY – Binabalaw ni ACT Teachers Representative ken Deputy Minority Leader Antonio Tinio ti Office of the President (OP) kalpasan a rimmuar iti National Expenditures Program (NEP) a 44.9 porsiento ti naisingasing a badyet ti Malacañang a mailatang laeng iti confidential ken intelligence funds ti Presidente.
Kinuna ti mammanday-linteg a ti alokasion ket isu ti kangatuan a nailatang a confidential and intelligence funds (CIF) iti naisingasing a badyet ti National Expenditures Program (NEP) a ₱7.2-trillion para iti 2027, nga isu ti alokasion para iti opisina ti presidente.
Impaganetget ni Tinio a maikontra daytoy iti ipanpannakkel ti administrasion a good governance.
Kunana pay a ti nakabutbuteng a 44.9 a porsiento iti naisingasing nga alokasion para iti Office of the President (OP) inton sumaruno a tawen ket iramanna ti kinunana a “the proposed budget for 2027 is composed of secret funds, underscoring the extent to which the highest office in the land relies on opaque allocations.”
Innayonna a ti badyet ti Office of the President (OP) ket nairaman ti agdagup a ₱4.55 bilion a nalimed a pondo a buklen ti ₱2.25 bilion a confidential funds ken ₱2.30 bilion a pondo ti intelligence a kunana a saan a nagbaliw no idilig iti 2026 ngem dandani kagudua a porsiento iti dagup a ₱10.773 bilion iti confidential and intelligence funds (CIF) kadagiti nadumaduma a sanga ti gobierno.
Binabalaw pay ni Tinio ti agparang a “double standard” iti agdama a politika iti pagilian a sangsanguen ni Bise Presidente Sara Duterte iti impeachment ken nainget a panangsukimat ti publiko gapu iti mapapati a di umiso a panangusar iti confidential funds idi daytoy ti sekretario ti Department of Education (DepEd).
