LAOAG CITY – Inaprobaran ti nailian a gobierno ti P4 bilyon a pundo nga ilatang para iti rehabilitasion ti imprastraktura iti probinsia ti Cebu a nadadael idi maudi a paset ti 2025 gapu iti gingined ken bagyo a napasaran iti probinsia.
Daytoy ti inrakurak ni Department of Public Works and Highways (DPWH) Secretary Vince Dizon iti panagbisitana manen idiay Cebu tapno inspeksionen ti sumagmamano a proyekto iti imprastraktura partikular iti siudad ti Talisay.
Inbatad ni Sec. Dizon, inaprobaran ni Presidente Ferdinand “Bongbong” Marcos Jr. ti P4 a bilyon a pundo tapno maipatakder manen dagiti nadadael nga imprastraktura pakairamanan dagiti pagadalan, flood control projects ken dagiti rangtay.
Karaman iti pundo ti maysa a feasibility study para iti Mananga river iti siudad ti Talisay a manamnama a maipatungpal sakbay ti panawen ti panagtutudo tapno maliklikan a maapektaran ti trabaho ken masigurado ti kinatalged ti publiko.
Daytoy ket saan laeng mainaig iti pammilin manipud mismo iti Presidente no diket tapno maipasigurado ti kinatalged ti biag dagiti residente nangruna kadagiti asideg iti Mananga river.
