LAOAG CITY – Mapatta-patta a dumanon iti P4 bilyon a balor dagiti proyekto ti Department of Education (DepEd) ti naapektaran ti panagsardeng dagiti programa ti United States Agency for International Development (USAID).
Segun ken ni DepEd Assistant Secretary Roger Masapol, adda ti lima a kangrunaan a proyekto iti babaen ti United States Agency for International Development a sumupsuporta iti edukasion ken imprastraktura pakairamanan ti ABC+ (USD47.5M), Opportunity 2.0 (USD37.5M), Gabay (USD2.77M), ILO-Ph (USD5M) ken Urban Connect (USD1.25M).
Iti pakabuklan, dumanon iti USD94.02 milyon wenno agarup P4 bilyon ti pundo manipud iti United States Agency for International Development.
Kas sungbat, inramanen ti Department of Education dagitoy nga inisyatibo iti 5-Point Agenda ni Education Secretary Sonny Angara tapno maipasigurado ti agtultuloy a reporma iti edukasion.
Inbatad ni Masapol, ti pannakaitantan ti United States Agency for International Development funded projects ket mabalin a makaapektar iti alisto a pannakaipatungpal ti pannakabalbaliw iti sektor ti edukasion.
