LAOAG CITY – Agdagup ti limapulo a milyon a pisos ti pundo nga inpaay ni Pres. Ferdinand R. Marcos Jr. iti babaen ti Presidential Assistance to Farmers, Fisherfolks and other families a nakaro a naapektaran ti tikag ditoy Ilocos Norte.
Inlawlawag ni Engr. Maria Teresa Bacnat, Officer In-charge ti Provincial Agriculture Office a dagiti benepisiario ket dagiti nangipadanon iti City/Municipal Agriculture Office iti balor dagiti nadadael a produkto dagitoy gapu iti tikag.
Inbatadna a kalpasan a naipadanon dagitoy iti opisinada ket insayangkat met dagitoy ti validation ken dagiti napasingkedan a nagpasar ti nakana a perdisyon dagiti maipapaayan ti tulong iti agdama a naggapo a mismo iti opisina ti presidente.
Segun kenkuana, dagiti karaman a maipaayan ti tulong iti babaen ti nasao a pundo ket dagiti napakaroan a kakailian.
Kunana a manipud iti walo ribu a nangipakaammo kadagiti nadadael a produkto dagitoy gapu iti tikag ket lima ribu ti napili a benepisiario.
Nupay kasta, inpakaammona a nagkiddaw a dagus ni Gob. Matthew Marcos Manotoc ti nayun a pundo manipud iti Malakanyang.
Paset daytoy iti kalikagum ti gobernador a maikkan amin ti tulong dagiti kakailian a nangipakaammo kadagiti nadadael a produktoda gapu iti tikag.
Kunana a mangnamnama ni Gob. Manotoc a patgan ti presidente ti kiddawna ket makaawat met laeng amin ti tulong dagiti nadakamat a walo ribu a kakailian.
Innayonna a ti sangapulo ribu a pisos a maipaay iti tunggal maysa a benepisiario ket usaren dagitoy kadagiti kasapulanda iti panagtalon ken mabalin pay nga usarenda iti panagadal dagiti annakda gapu iti kaawan ti nasayaat nga apit dagitoy gapu iti tikag.
Maipalagip nga immuna nga inpasa ti Sangguniang Panlalawigan ti maysa a resolusion a mangited ti bileg ken ni Gov. Manotoc a mangibagi ti gobierno probinsial a mangawat ti 50 a milyon a pisos manipud iti national government.
