LAOAG CITY – Inaprubaranen ti Senado ti nailungalong a P6.793 trilyon a national budget para iti 2026, babaen ti panagbotos ti 17 a senador pabor iti daytoy ken awan ti abstention.
Ti pannakaadal a naimbag ti pondo ket indaulwan ni Senate Finance Committee Chairman Sherwin Gatchalian.
Naipalaon ti nasao a lungalong iti House Bill No. 4058 wenno General Appropriations Act of 2026 a gagem na a pondoan dagiti kangrunaan a programa ti gobierno.
Agpada nga inaprubaran ti kamara de representantes ken senado ti bersyon da iti national budget para iti 2026 isut gapuna a naikeddeng ti bicameral conference committee manipod Disyembre 11 agingga iti 13 tapno pagmaymaysaen ti probisyon.
Kalpasan ti bicam, isubli ti reconciled budget bill iti dua a pagpandayan linteg iti kongreso para iti ratipikasyon.
Apaman a naratipikaran, maisumitir daytoy ken ni Presidente Ferdinand Marcos Jr. tapno pirmaan sakbay nga agngudo ti agdama a tawen.
Ti budget ket nailatang para iti imprastruktura, edukasyon, salun-at, depensa, ken climate resilience programs.
Nagtalinaed met ti P175 bilyon nga unprogrammed funds a dinillaw ti sumagmamano a senador gapu ta nakurang ti pannakailawlawag ti pondo.
Iti pakabuklan, daytoy ti kadakkelan a national budget iti pakasaritaan ti Pilipinas a gagem na a suportaran ti panagdur-as ti ekonomiya ken serbisyo.
