LAOAG CITY – Nai-deliver ti siam a ribu a pisos a balor ti taraon iti Bacarra Municipal Fire Station a saanda met nga in-order iti aniaman a pasdek-panganan.
Segun ken ni F/Supt. Roxanne Parado, Provincial Fire Marshall ditoy Ilocos Norte, agarup iti oras ti alas diyes agingga iti alas onse ti bigat ket adda ti kellaat lattan a napan nangi-deliver ti adu a taraon iti Bacarra Municipal Fire Station a nakakigtotan dagiti naka-duty a bumbero.
Inbatadna a dagiti nasao a nai-deliver a taraon ket cash on delivery banag a no dadduma ket mapilitanda a bayadan dagitoy.
Inlawlawagna nga adda metten ti pammilinna kadagiti amin a fire station iti intero a probinsia a saanda a dagus nga alaen wenno bayadan ti nai-deliver a taraon no saanda nga in-order imbes ket isublida lattan dagitoy.
Kunana a para kadagiti food stalls wenno fast food chains ket masapol a rumbeng nga iberipikarda nga umuna sakbay ti panangi-deliver-da kadagiti taraon iti fire station tapno maliklikan ti pannakalukoda.
Innayonna a gapu iti asi ti Municipal Fire Marshal ket binayadanna ti nai-deliver kadakuada a taraon uray saanda met daytoy nga in-order.
Kabayatanna, naammoan nga addan dagiti immuna a napasamak iti kapada nga insidente iti dadduma pay a fire station iti kallabes kas iti Pasuquin Municipal Fire Station.
