LAOAG CITY – Inbutaktak iti korte ti maysa a testigo ken dati a Department of Public Works and Highways (DPWH) Bulacan District Engineer Henry Alcantara a maipagarop nga umabot iti P90 million ‘kickback’ fee ti naukkon da para ken ni dati a Senador Ramon “Bong” Revilla Jr. mainaig iti maysa a flood control project iti Bulacan.
Inbatad pay ti dati a DPWH District Engineer a binilin ti dati a boss na a ni dati a Public Works Undersecretary Roberto Bernardo a kolektaren ti nasao a kantidad manipod kadagiti contractor.
Segun ken ni Alcantara, naala ti kwarta manipod iti advance payments dagiti contractor ken maipagarop a naipatulod daytoy iti maysa nga hotel iti Roxas Boulevard iti babaen ti driver na.
Kuna na a ti P90 million ket naikabil iti uppat agingga iti lima a bank boxes a naglaon ti sag-P20 million ti tunggal maysa.
Nupay kasta, inbatad ti testigo a saanna a malagip ni direkta a naawat ni Revilla ti sibubukel a katindad.
Inpakaammo pay ni Alcantara nga agpirpirma kadagiti dokumento a nangipapaay ti otoridad iti bayad para iti P92.8 million a flood control project iti Pandi, Bulacan, uray saan a mismo nga isuna ti nangiyuswat ti inspeksyon iti proyekto.
Innayon na a mangnamnama laeng kadagiti report kenkuana dagiti subordinates na a mangibagbaga a nagbalin a naurnus ti naisayangkat a proyekto.
