LAOAG CITY – Inpasigurado ti Philippine Air Force nga agtultuloy ti panagpatrolyada iti West Philipine Sea iti baet ti ipatpatungpal ti China ti ‘arrest policy’ kontra iti asinoman a gangganaet a sumrek iti West Philippine Sea.
Segun ken ni Philippine Air Force Spokesperson Colonel Maria Consuelo Castillo, awan ti makalapped iti isaysayangkatda a monitoring gapu ta paset daytoy iti responsibilidad ken trabahoda.
Inbatadna a bantayanda ti territorial water ti Pilipinas ken ti Exclusive Economic Zone.
Naammoan nga idi Sabado idi mangrugi nga ipatungpal ti China ti pagannurutan nga arestaren ken ibaludda dagiti “foreign trespassers” iti West Philippine Sea iti uneg ti 60 nga awan ti maiyuswat a panangtingiting.
Agtultuloy met ti Philippine Coast Guard iti panagpatrolyada ken gutgutigutenda dagiti mangngalap nga ituloyda laeng iti panagkalap dagitoy iti lugar.
Kuna pay ni Castillo a ti panagpatrolyada ket para iti kampania ti gobierno kontra iti smuggling.
Iti kinapudnona, masapol pay ti Philippine Air Force ti kanayunan nga air assets para iti pannakapaiget ti monitoring-da iti West Philippine Sea ken dadduma pay a paset iti pagilian.
