LAOAG CITY – Suportado ni House Speaker Faustino “Bojie” Dy III ti desision ni Ombudsman Jesus Crispin Remulla nga ikkaten ti restrictions iti panangipublikar ti Statements of Assets, Liabilities and Net Worth wenno SALN dagiti agpapaay iti gobierno.
Inbatad ni Dy a naikeddeng nga i-review ti House of Representatives ti pagalagadan mainaig iti panangipublikar ti Statements of Assets, Liabilities and Net Worth.
Kunana a sitatallugod ditoy dagiti miembro ti Kamara ken talantanenda ti pormal a proseso mainaig iti daytoy kabayatan nga addada iti Congressional break tapno makairuarda ti nalawag, transparent ken consistent a pagannurotan.
Inlawlawagna a nasayaat nga isubli ti dati a nakadawyan a nakalukat iti publiko ti Statements of Assets, Liabilities and Net Worth dagiti agpanpanday linteg.
Nakasagana ni Dy a mangidaulo wenno agbalin nga ehemplo iti panangibutaktak ti Statements of Assets, Liabilities and Net Worth-na no kasapulan.
