LAOAG CITY – Nadiskubre dagiti kameng ti Philippine National Police ti maysa a maipagarop a shabu laboratory iti Sitio Sagel, Brgy Pinol, Maitum, Sarangani Province iti uneg a mismo ti maysa a warehouse.
Basar iti report a naawat ti Philippine National Police Camp Crame, rinaot dagiti kameng ti pulisya ti lugar bitbit da ti Search Warrant ket ditoy a nakita da dagiti kagamitan a maipagarop a maus-usar iti panagaramid ti shabu.
Malaksid iti daytoy, naestablisar pay a ti nasao a warehouse wenno bodega ket adda iti uneg ti kampo a tagtagikwaen ti Moro National Liberation Front.
Agtultuloy ti isaysayangkat nga imbestigasyon ti nailian a pulisya tapno maestablisar no siasinno ti karaman iti nasao nga illegal nga aktibidad.
Iberberipikar payen ti Philippine National Police ti pakabigbigan ti maipagarop a chinese national nga agsubli-subli iti nadakamat a lugar.
