LAOAG CITY – Kinumpirmaran ti Philippine Amusement and Gaming Corporation wenno PAGCOR nga iberberipikar da ti impormasyon seknan ti maipagarop a dati nga hepe ti Philippine National police a timmulong ken ni dismissed Bamban, Tarlac Mayor Alice Guo a makaruwar iti Pilipinas.
Iti baet daytoy ti inpataw nga hold departure order kontra iti dati a mayor.
Inaramid ni Philippine Amusement and Gaming Corporation official Raul Villanueva ti nasao a kumpirmasyon iti naiyuswat a panagdengngeg iti illegal nga operasyon ti Philippine Offshore Gaming Operator (POGO) iti pagilian.
Nagbalin daytoy a sentro ti saludsud ni Senador Risa Hontiveros iti opisyal ti Philippine Amusement and Gaming Corporation.
Sinaludsud ti senadora no adda ti posibilidad na nga adda dagiti opisyal ti gobierno a timmulong ken ni Alice Guo ken dagiti kakadwa na a naglibas iti pagilian kasukat ti dakkel a kantidad.
Dinakamat pay ni Villanueva a maipagarop a sumagmamano nga high-ranking immigration officials ti possible a karaman iti panaglibas da Guo basar iti intel da.
