LAOAG CITY – Saanen nga umaw-awat ti baro nga aplikasion ti Philippine Amusement and Gaming Corporation (PAGCOR) manipud iti internet gaming licensees kalpasan a naipatungpal ti total ban iti Philippine Offshore Gaming Operator.
Iti panangrugi ti joint public hearing ti nabukel a Quad Committee idiay Bacolor, Pampanga, tiningiting ni SAGIP Party-list Representative Rodante Marcoleta no natungpalen ti Philippine Amusement and Gaming Corporation ti direktiba ni Presidente Bongbong Marcos idi maikatlo nga State of the Nation Address.
Segun ken ni Philippine Amusement and Gaming Corporation Vice President for Offshore Gaming and Licensing Department Atty. Jessa Fernandez, insardengdan ti panangiproseso ti applications ken kanayunan a sites ken nangrugin ti pannakaipatungpal ti hiring ban.
Inbatadna nga agkiskissay metten ti operational sites ti internet gaming licensees ken boluntario nga agap-aplikar para iti pannakaipasardeng ken dagiti sumaruno a bulan ket manamnama a basbassiten ti opersionda.
Inlawlawag ni Fernandez nga ad-adalen dagiti nagduduma nga ahensia ti hollistic approach iti pannakaipatungpal ti total ban ti Philippine Amusement and Gaming Corporation.
Kunana a masapol nga agipasa ti internet gaming licensees iti Philippine Amusement and Gaming Corporation ti comprehensive plan para iti pannakaipasardeng ti operasion ti amin a maseknan inton December 31, 2024.
Kuna ti opisial a saan a masapol ti panagalisto iti pannakaisardeng kadagiti Philippine Offshore Gaming Operator.
Nupay kasta, saan a kumbinsido ni Marcoleta gapu ta nalawag ti inbatad ni Pres. Marcos a sipod idi aldaw a naiyuswat ti State of the Nation Address ket maipasardengen ti Philippine Offshore Gaming Operator.
