LAOAG CITY – Inbatad ni Doctor Melvin Manuel, ti mangidadaulo iti Business Permits and Licensing Office (BPLO) ditoy ciudad ti Laoag a tunggal panaglulukat ti klase ket mapan aginspeksyun ti Inspection team kadagiti pagkaseraan iti ciudad.
Inlawlawag na a ditoy a kitaen da a naimbag no natalged, adda ti fire alarm dagiti pagkaseraan ken no komportable met laeng dagiti agkasera nga estudyante.
Kuna pay ni Manuel a kitaen da pay no agsupadi ti pagdigusan dagiti babbai ken lallaki, ken masapol nga awan ti abot-abot na tapno masigurado nga awan ti makasirip.
Innayon na a masapol nga amin nga agpakasera ditoy ciudad ti Laoag ket adda ti permit na.
Mainaig ti daytoy, inpetteng ni Manuel a responsibilidad dagiti agpakasera ti seguridad dagiti agkasera.
Innayon na a tapno masigurado da a sursuruten dagiti agpaksera dagiti pagalagadan ket mapan da pay aginspeksyon iti rabii.
