LAOAG CITY – Naggil-ayab ti hose ti tangke a paglutlutwan ti maysa a pwesto a paglakoan ti empanada iti Brgy. Quiling Norte iti ciudad ti Batac.
Daytoy ti inbatad ni Fire Officer 2 Richard Bong Bacnat, imbestigador iti Bureau of Fire Protection (BFP) iti ciudad ti Batac.
Segun ken ni Bacnat, ti palawag kadakuada ni Mr. Erwin Peralta, pimmanaw iti pwesto na tapno mapan mangala ti dadduma a mausar na iti panagaramid na ti empanada.
Nupay kasta, iti panagsubli ni Peralta ket nakigtot kalpasan a nakita na nga agap-apoyen ti hose ti us-usaren na a tangke.
Gapu iti daytoy, nagkiddaw a dagus ti tulong ken insigida met a napan nagresponde dagiti kameng ti Bureau of Fire Protection isut gapuna a nasebseban a dagus ti apoy.
Awan ti sabali a nadadael iti insidente gapu ta alisto a nasebseban ti apoy.
