LAOAG CITY – Rimmuar dagiti amin nga empleado ti lokal a gobierno ditoy siudad ti Laoag.
Daytoy ket kalpasan ti narikna a napigsa a 5.4 magnitude ginggined iti ili ti Pagudpud, Ilocos Norte.
Segun ken ni Dr. Melvin Manuel, ti mangidadaulo ti City Disaster Risk Reduction and Management Office ditoy siudad ti Laoag, dagus a pinaruarda dagiti amin nga empleado iti lokal a gobierno ken nagturongda iti Aurora Park.
Inbatadna nga apaman a nagsardeng ti ginggined ket napagsubli met laeng dagiti sumagmamano nga empleado iti laud a paset ti City Hall idinto a dagiti akin-sango a pangopisinaan iti lokal a gobierno ket masapol pay laeng a mangiyuswat ti inspeksion dagiti building official.
Inlawlawagna nga awan dagiti nadangran nga empleado ken awan met dagiti nakaro a nadadael gubuay iti panagdayyeg ti ginggined.
Innayonna ti panagbalin nga alerto no adda dumteng a didigra tapno maliklikan ti aniaman nga aksidente.
Mainaig iti daytoy, basar iti Philippine Institute of Volcanology and Seismology ket napasaran ti Intensity V iti ili ti Adams, Bacarra, Bangui, Burgos, Dingras, Dumalneg, ditoy siudad ti Laoag, Pagudpud, Pasuquin, Sarrat, ken Vintar, Ilocos Norte pakairamanan iti Lacub, Abra.
Intensity IV iti Magsingal, Ilocos Sur, Intensity III iti siudad ti Ilagan, Isabela ken Intensity II iti Peñablanca, Cagayan.
Kabayatanna, nadlaw ti Intensity VI iti ili ti Pasuquin, Intensity V ditoy ti Laoag, Intensity IV iti Sinait ken iti siudad ti Vigan, Ilocos Sur pakairamanan iti Claveria, Cagayan. Kamaudiananna, narikna ti Intensity III iti Gonzaga, Cagayan; siudad ti Ilagan, Isabela idinto nga Intensity II iti Solsona, Ilocos Norte ken Peñablanca, Cagayan.
