LAOAG CITY – Kiniddaw ni Senate Minority Leader Alan Peter Cayetano ti panangilawlawag ti economic team ti gobierno mainaig iti manarimaan a kasasaad dagiti pondo iti salinong ti 2026 national budget ken ti pakabukelan nga utang ti gobierno.
Sinaggaysa ni Cayetano dagiti saludsod iti Development Budget Coordination Committee (DBCC) babaen iti maysa a surat ken ni Finance Committee Chairperson Senator JV Ejercito, bayat ti briefing iti Sendo mainaig iti 2027 National Expenditure Program (NEP).
Karaman kadagiti saludsod ni Cayetano iti Department of Budget and Management (DBM) ket no mano iti 2026 budget ti nagastosen, nausaren kadagiti proyekto ken mano pay ti nabatbati
Malaksid iti daytoy, kalikagumna pay a maamoan manipud iti nasao nga ahensia ti “absorptive capacity” wenno ti pakabukelan a magastos ti tunggal ahensia.
Kabayatanna, mainaig iti Department of Finance (DOF), sinaludsod ni Cayetano no mano ti utang ti gobierno agingga Hulio 31 ita a tawen, pakairamanan kadagiti loan ken bond nga inaramat ti gobierno iti naglabas a tallo a tawen.
Gapu iti daytoy, kiniddaw ni Cayetano kadagiti nadakamat nga ahensia ti nasapa a panangisubmitirda kadagiti sungbatda mainaig kadagiti kasapulan a dokumento tapno maikkan ti naan-anay a panawen dagiti senador a tingitingen daditi dokumento sakbay iti naikeddeng a budget hearing iti tunggal ahensia.
