LAOAG CITY – Nagballigi ti naisayangkat a Palarong Pambansa 2025 ditoy Ilocos Norte.
Saan a mailadawan ti kinaragsak ti National Capital Region gapu iti pannakagun-od da manen ti Overall Champion para iti Palarong Pambansa no sadinno a daytoyen ti maika-18 a tawen nga iggem da ti nasao a titulo.
Saan a nagatendar ni Presidente Ferdinand Marcos Jr. iti closing ceremony ti Palarong Pambansa ngem inbagian daytoy ti kabsat na a ni Presidential Sister Irene Marcos.
Karaman pay kadagiti nagatendar iti panagleppas ti Palarong Pambansa 2025 ket isuda Department of Education Secretary Sonny Angara; Undersecretary Malcom Garma, ti Secretary General ti Palarong Pambansa; Commission on Higher Education (CHED) Commissioner Dr. Shirley Agrupis, Volleyball icon Alyssa Valdez, Congressman Angelo Marcos-Barba, Olympic Gold Medalist Hidilyn Diaz, Creamline Cool Smashers, Governor Matthew Marcos-Manotoc, kasta pay dagiti local officials ditoy probinsya ken dadduma pay.
Iti panagbitla ni Governor Matthew Marcos-Manotoc, nagyaman kadagiti amin a timmulong ken nakipaset iti pannakaisayangkat ti Palarong Pambansa ditoy probinsya.
Saan met a nalipatan ti gobernador a nagyamanan ni Mayor Michael Marcos-Keon gapu ta isuna ti ibilang na a rason no apay a naiwayat ti Palarong Pambansa ditoy probinsya ita a tawen.
Kuna na ni Mayor Keon ti nangpalpalagip kenkuana nga ag-bid tapno ag-host ti Ilocos Norte iti Palarong Pambansa.
Mainaig iti daytoy, iti met panagbitla ni Department of Education Sec Angara, inbatad na nga ado dagiti komento a mangmangngeg na a ti opening ceremony ti Palarong Pambansa 2025 ti maysa kadagiti kapintasan iti pakasaritaan ti Palarong Pambansa gapu ta mabalin payen a pang-Southeast Asian Games ken pang-Asian Games.
Kabayatanna, ti sumaruno nga ag-host para iti Palarong Pambansa 2026 ket iti probinsya ti Agusan del Sur.
