LAOAG CITY – Pormalen nga insubli ti lokal a gobierno iti ili ti San Nicolas iti panangidaulo ni Mayor Mike Hernando ti “Palit Basura Program.”
Segun kenkuana, ti pannakaisubli iti nasao a programa ket tapno malapdan ti panagpuur dagiti residente iti nadakamat nga ili.
Inbatadna a ti “Palit Basura Program” ket maysa a wagas ti lokal a gobierno tapno mas ad-adda a maallukoy dagiti umili nga agibasura iti umiso a pakaikabilanna.
Kunana a dagiti nagawangan kadagiti nagduduma a produkto ket mabalin nga urnungenda ken ikabil daytoy iti lokal a gobierno tapno masuktan dagitoy a basura kadagiti ramit a mausar iti uneg ti pagtaengan wenno pagadalan.
Inlawlawagna a babaen iti daytoy ket mapagbalin a kagamitan dagiti mapidotda a basura nga imbes a maiwara wenno puuranda laeng.
Maipalagip nga immunan a nairubuat ti nasao a programa kadagiti naglabas a tawen ngem temporario a naipasardeng gapu iti COVID-19 pandemic.
