LAOAG CITY – Positibo ti naiyuswat a search operation iti Barangay Dariwdiw iti ciudad ti Batac babaen iti Philippine National Police.
Nabigbig ti subject ti operasyon a ni Jun Agacia, agtawen ti 29, maysa a construction worker ken residente iti nadakamat a barangay.
Nasukimat dagiti otoridad ti maysa a kalibre 38 a paltog nga addaan ti uppat a bala ken dua a pidaso ti bala iti kalibre 45 a paltog, ken uppat a sachet ti maipagarop a shabu.
Segun kenni Police Lt. Col. Adrian Gayuchan, ti chief of police ti PNP-Batac, ni Agacia ket drug surenderee idi Disyembre ken naiyuswatan pay ti search operation idi 2020.
Inbatad na a manunganay ti pannakaiyuswat ti operasyon kalpasan a nakumpirmaran a pudno dagiti impormasyon mainaig iti daytoy.
Maianig iti daytoy, inbatad ni Barangay Captain Rey Ventura nga adda ti naidanon kenkuana nga impormasyon a maipagarop nga adda ti pakainaigan na iti iligal a droga iti laksid a daytoy ket simmuko.
Inbatad nga awan met ti naidandanon kenkuana nga impormasyon nga adda ti ikot ni Agacia a paltog.
Kunana nga iti kallabes ket adda ti naar-aramid ni Agacia kas iti panangkarit na iti barangay tanod, maipagarop a kinabil na ti ama na ken dadduma pay a report iti uneg ti barangay da.
Kabayatanna, inbatad na nga adda ti alegasyon ti pamilya ni Agacia nga adda ti dua nga ummuna a maipagarop a simrek iti pagtaengan da.
Nupay kasta, kuna ni Gayuchan nga adda met ti body worn camera a maus-usar rason nga alegasyon laeng daytoy ti pamilya.
Iti agdama, maisagsaganan ti maipila a reklamo kontra kenni Agacia iti panaglabsing na iti Republic Act 9165 ken Republic Act 10591.
