LAOAG CITY – Inpetteng ni Vice President Sara Duterte a saanda nga umawat ti donasion para iti kaso ti amana a ni dati a Presidente Rodrigo Duterte.
Iti panagsangona iti media ken kadagiti supporters idiay The Hague, The Netherlands, inbatad ni Vice President Sara a napagsasaritaanda nga agkakabsat a saanda nga umawat ti donasion ken saanda nga agkiddaw ti tulong para iti kaso ti amada.
Inlawlawagna a no kasapulan nga aglakoda kadagiti kagamitanda ket isu ti aramidenda tapno makaukkon para iti kaso ti dati a Presidente.
Inlawlawagna a bukudda a gastos nga agkakabsat ti inusarda iti panagbiaheda idiay The Netherlands.
Kunana nga inton agawid isuna ditoy Pilipinas ken ti agina nga isuda Honeylet ken Kitty Duterte ket ni Cong. Paulo Duterte pay laeng ti mangsukat kadakuada idinto nga inton Mayo met ken ni Davao City Mayor Sebastian Duterte ti agturong idiay The Netherlands.
Innayonna a masapul nga adda ti miembro ti pamilia a mabati idiay The Hague tapno adda ti kasarsarita ni dati a Presidente Duterte ken tapno adda ti mangipaay ti updates iti mapaspasamak iti ruar ti International Criminal Court (ICC) ken no ania ti mapaspasamak ditoy Pilipinas.
