LAOAG CITY – Kalikagum ti pamilia Duterte a ditoy Pilipinas a matay ni dati a Presidente Rodrigo Duterte no bilang matay daytoy sakbay a malpas ti panangusig kenkuana iti International Criminal Court (ICC).
Inbatad ni Vice President Sara Duterte nga adda ti posibilidad a matay ti amana iti uneg ti pagbaludan banag a nagsaritaanda daytoy ti Presidente.
Inadmitir ti Bise Presidente a nangipaayen ti maudi a bilin ti amana no matay isuna iti International Criminal Court detention facility.
Nupay kasta, kas maysa a Pilipino ken maysa nga anak, kuna ni Vice President Sara a kalikagumda a ditoy Pilipinas a matay ti dati a Presidente.
Adda ti panagbuteng ti pamilia a mabalin a matay iti pagbaludan iti sabali a pagilian ti dati a Presidente gapu iti kinataengna ken ti mapaspasaranna a sakit iti kudil kabayatan a nakabalud.
Mainaig iti daytoy, kiniddaw ni Vice President Sara iti International Criminal Court nga iyalisto ti proseso ti panangusig kontra iti amana a manarimaan a nakabalud ti sumurok maysa a tawen ken uppat a bulan.
Iti baet nga adda ti maudi a bilin ti dati a Presidente, inpetteng ti pamilia a nasayasayaat a pagawiden isuna iti bukudna a pagilian tapno sangoen ti nabatbati a sumagmamano nga aldaw.
Sumangsango ti dati a Presidente iti tallo a bilang ti krimen gapu iti maipagarup nga insidente ti pammapatay iti babaen ti war on drugs ti administrasionna.
