LAOAG CITY – Maluksaw ni Mrs. Felecitas Espiritu iti Barangay Talingaan ditoy ciudad ti Laoag iti inaramid ti Black Nazarene Hospital iti ili ti San Nicolas iti pamilya da.
Inlawlawag na nga intaray na ti kabsat na iti nasao nga ospital ken kas paset ti protocol ket naipadalan nga immuna ti antigen test sakbay a naiserrek iti emergency room ket negatibo ti resulta na.
Inbaga na nga uray isuna a nangkuyug ket dimmalan met ti antigen test ket negatibo ti resulta na.
Nupay kasta, inbaga ni Espiritu a pimmusay met laeng ti kabsat na kabayatan ti panangtamtaming dagiti doktor.
Inpakaammo na nga iti dayta met laeng a gundaway ket kinasarita isuna dagiti doktor ken inbaga da a paala nan ti bangkay ti kabsat na nga isumet ti inaramid na babaen iti papan panangala ti tinawagan da a punerarya.
Innayon na a sakbay a nairuwar ti bangkay ti kabsat na ket nakita na nga adda ti pinirmaan ti taga-punerarya iti uneg ken iti ayan ti guwardia iti nasao nga ospital.
Mainaig iti daytoy, inpalgak ni Espiritu a sumagmamano laeng nga oras kalpasan a naisangpet ti bangkay ti kabsat na iti pagtaengan da ket adda dagiti napan a Barangay Health Workers (BHW) tapno ipakaammo a positibo ti swabtest ti pimmusay a kabsat na.
Gapu iti daytoy, nakigtot ni Espiritu gapu ta awan pulos ti inbagbaga kenkuana ti ospital ken kwinestyunaran na pay no apay nga inpalubos da a nairuwar ken naiyawid ti bangkay ti pasyente da.
Inpetteng na a gapu iti napasamak ket saan laeng nga isuda a pamilya ti naka-lockdown no di ket nairamraman pay dagiti dadduma a kabagyan da a napan nakiandingay kadakuada iti ipupusay ti kabsat na.
Inbaga pay ni Espiritu iti Bombo Radyo Laoag a tinawagan isuna ti ospital ken nagpadespensar iti napasamak.
Nagturong met ti news team ti Bombo Radyo iti Black Nazarene Hospital ngem nagkedked a nagpainterview ti management ti nadakamat nga ospital.
Iti pannakisarsarita ti news team ti Bombo Radyo kadagiti empleado iti admission area ken naibaga da nga adda ti admission slip a permaan dagiti pasyente a sumrek iti emergency room no sadinno a nailanad ditoy ti impormasyon dagiti pasyente ken adda pay ti permit slip para iti RT- PCR test.
Kalikagom pay ti management a makasarita manen ni Mrs. Espiritu para iti panangiwayat da ti naan-anay nga imbestigasyon tapno maamoan no adda ti nagliwayan ti nadakamat nga ospital.
