LAOAG CITY – Maluksaw ti pamilya ni Police Corporal Wilbert Rarogal Jr. iti pannakapaltog a nakatayan na idiay Barangay Santiago, Marcos, Ilocos Norte.
Segun kenni Mr. Wilbert Rarogal Sr., ti ama ni biktima, kalpasan ti panagakas da ti irik ken imminom da ti nasanger ket nagpakada ti anak na a mapan da iti minatayan.
Inlawlawag na basar ti naamoan na nga impormasyon, idi agawid ti grupo ti biktima ket maipagarop a binarikadaan ni Barangay Chairman Jimmy Pablo iti Barangay Cacafean iti nasao met laeng nga ili ken pinaltogan ti kadwa ti kapitan ni Rarogal Jr.
Kunana a sakbay a nagturong ti biktima iti minatayan ket inyangaw na a no agretiro ket agkandidato.
Inbatad na nga awan ti nakarirriri ti anak na iti lugar da kasta met nga awan ti susik ti pamilya na iti pamilya ti nasao a kapitan.
Desidido ti pamilya Rarogal nga agipila ti reklamo kontra kenni Pablo.
Naamoan nga awan met ti nadlaw da a senyales nga adda ti dakes a mapasamak iti anak da ngem kunana laeng a mauma iti operasyon.
Mainaig iti daytoy, kuna ti ama a Rarogal a naitaray pay iti ospital ti asawa na gapo ta saan na a maawat ti pannakatay ti anak da.
Kabayatanna, immapela ti ama kenni Pablo nga agpudno no siasinno ti nangpaltog iti anak na tapno masolbar ti kaso ken maikkan ti hustisya ti pannakatay ti biktima.
