LAOAG CITY – Emosyunal ni Mrs. Catalina Madarang Peralta, ina ti baro a chief justice ken retirado a mangisursuro ditoy ciudad ti Laoag a ni Diosdado Peralta.
Daytoy ket kalpasan a naamuan na a kamaudianan na ket naapointaran met laengen ti anak na a baro a Chief Justice.
Segun ken ni Mrs. Peralta, kas maysa nga ina ket sibubukel nga ipagpanakkel na ti anak iti sabali manen a ballaigi a nagun-od na isu a napalaos ti panagyaman da iti Diyos.
Kinuna na nga inbaga kenkuana ti anak na a no maawatna ti appointment na ket isu ti umuna a pangibagaan na ken saan na nga ibagbaga pay laeng iti siasinnuman.
Inbaga ni Mrs. Peralta a no estoryaen na no kasano ti rigat a naglabasan ti anak na kasanguanan a nagun-od na ti ballaigi ket abuten da ti maysa nga aldaw.
Maipalagip nga idi malem kalman ket pormal nga inapointaran ni Pres. Rodrigo Duterte ni Peralta kas baro a chief justice.
Sinukatan ni Peralta ni sigud a Chief Justice Lucas Bersamin a maysa met la nga Ilokano ken nagretiro idi Oktubre 19, 2019 ken isu na ti ma ika-26 a CJ iti Korte Suprema.
