LAOAG CITY – Nagdinnungpar ti pampasahero a jeepney ken van iti Manila North Road iti Brgy. 18 San Agustin iti ili ti San Nicolas.
Nabigbig ti nangiturong ti pampasahero a jeepney a ni Julie Dafun y Tungpalan, agtawen ti 63, naasawaan, residente ti Brgy. 41 Balacad ditoy siudad ti Laoag.
Nabigbig met ti nangiturong ti Green Ford F150 Van a ni Geoverick Riñon y Lata, agtawen ti 42, naasawaan, residente ti Brgy 49-B ditoy siudad ti Laoag.
Segun ken ni P/Capt. Randy Damo, Hepe ti San Nicolas Municipal Police Station, kabayatan a dumaldalyasat ti pampasahero a jeepney nga agturong nga agpa-abagatan ket maipagarup nga immagaw ti linya iti kalsada ti van a nangitunda ti panagdinnungparda.
Inbatadna nga adda ti dua a pasahero a nakalugan iti jeepney a maitulod iti tiendaan iti siudad ti Batac idinto nga adda met ti pito nga indibidual a kadua ti nangiturong ti van nga aggapu idiay siudad ti Baguio.
Inlawlawagna a basar iti nagsaritaan ti agsumbangir a partido ket ibaklay amin ti nangiturong ti van ti gastosen ti pannakatarimaan ti pannakadadael ti pampasahero a jeepney.
Innayonna a saan a naan-ano dagiti amin a nakalugan iti pampasahero a jeepney ken van idi napasamak ti insidente.
