LAOAG CITY – Ibilang ni Atty. Neri Javier Colmenares, Presidential Adviser on Human Rights ti Integrated Bar of the Philippines (IBP) a ti nagbalin a rakurak ni Dati a Presidente Rodrigo Duterte ket maibilang a drama wenno pamapogi iti senate hearing, kalpasan nga inako na ti responsibildad dagiti operasion kontra iti illegal a droga babaen iti administrasyon na.
Segun kenkuana, rumbeng nga ammo ni Duterte a dagiti “illegal orders” ket saan a mabalin nga usaren a depensa iti sidong ti linteg ti Pilipinas.
Kinunana a nupay nga inako ni Duterte ti responsibilidad, saan a makaliklik dagiti nairaman a kameng ti polisia gapu ta illegal ti nagbalin a pammilin na.
Innayonna nga uray kalikagum ni Duterte a dalusan ti naganna ket saanna a maibabawi ti nagbalin a rakurakna nga minandarna dagiti polis nga allukoyen dagiti drug suspects a lumaban ken no arimidenda daytoy patayenda dagitoy.
Inpaganetget ni Colmenares pinlawa dagiti nagbalin a rakurak ni Duterte ti imbestigasyon iti International Criminal Court (ICC) ken mangitunda daytoy iti ti naun-uneg nga imbestigasion kadagiti mapapati nga extrajudicial killings iti pagilian.
Malaksid iti daytoy, kwinestionaranna ti pannakipaset ni Senator Ronald “Bato” Dela Rosa iti panagdengeg ti Senado maipanggep iti mapapati extrajudicial killings ti Duterte administration gapu ta maibilang isuna kas maysa nga akusado iti nadakamat nga isyu.
Segun kenkuana, saan nga umno a palubusan ti ti maysa nga akusado a makipaset iti imbestogasion kadagiti banag a mainaig iti kasona.
Mainaig iti daytoy, kiniddawna a saan kuma a palubusan ti senado ni Dela Rosa a makipaset kadagiti sumaruno a panagdengeg tapnu masigurado ti pangabalin a patas dagitoy.
Kinunana, a napateg a suportaran ti gobierno ti imbestigasion ti International Criminal Court ken ti panangisubmitir ti Senado ebidensia tapno masungbatan dagiti responsable.
Kabayatanna, immapela ni Colmenares iti Senado a pagtalinaeden ti integridad dagiti panagdengngegda ken maipatungpal ti patas a hustisia kadagiti amin a nairaman.
