LAOAG CITY – Inlawlawag ni Barangay Chairman Rosephil Ramones iti Barangay 12 iti ili ti Bacarra nga inbilin ti Municipal Health Office (MHO) a makanselar ti naituding a pannakaswab test dagiti agasawa a kabarayangan da.
Segun kenni Ramones, naibabawi pay ti panaghome quarantine dagiti agasawa.
Ummuna iti daytoy, kunana nga idi kalman ket nangiyuswat ti PNP ken MHO ti contact tracing iti nasao a barangay ken nabalakadan nga ag-home quarantine dagiti agasawa.
Naamoan a dagiti agasawa ket kaanakan da ti nagpositibo a maysa a nurse.
Nupay kasta, idi met laeng rabii ket adda ti naawat na a mensahe manipud iti MHO a makanselar ti pannakaswab test dagiti agasawa gapo ta iti naun-uneg nga imbestigasyon ket saan a karaman dagiti agasawa kadagiti exposure.
