LAOAG CITY – Inyalud-od ti Gobierno Probinsial babaen iti Provincial Small and Medium Enterprise Office ti panagawat iti aplikasion kadagiti agkalikagum a manggundaway iti Business Rehabilitation Program ti probinsia agingga inton Pebrero 11.
Gagem ti panangiyalud-od ti Gobierno Probinsial ti ad-adu pay nga aldaw tapno maaddaan ti gundaway dagiti dadduma a saan pay a nakaisubmitir kadagiti nasken a dokumento.
Gapu iti daytoy, kuna ni Mrs. Elma Gabriel, ti mangidadaulo ti Provinciah Small and Medium Enterprise Office nga agtultuloy ti panagawatda ti aplikasion iti Mataginayon a Progreso tapno agtultuloy ti panagpadur-as kadagiti bukodda a negosio ita a panawen ti pandemia.
Kunana a dagiti interesado ket agturong laeng kadagiti bukod a City wenno Municipal SME Coordinators tapno ammoen dagiti kasapulan a papeles a maisubmitir iti probinsia.
Inlawlawagna a nangrugi manen ti panagawat iti opisinada idi Enero 26 agingga inton Pebrero 11 iti daytoy a tawen no sadino adda tallo ribu a pisos ti awaten iti tunggal maysa a manggundaway iti nasao a programa.
Innayonna a dagiti laeng agtagikua kadagiti micro enterprise nga awan pay a pulos ti naawatna ken awan pay ti inaplikaranda a programa ti maipaayan iti nasao a tulong manipod iti Gobierno Probinsial.
