LAOAG CITY – Manarimaan ti pannakaproseso ti pannakaiyawid dagiti distressed OFWs nga adda idiay Metro Manila.
Inbatad ni Gov. Mathew Marcos Manotoc iti press conference a naipatuloden ti maikadwa ken maikatlo a trip a mangsukon kadagiti kaprobinsyaan nga inyendorso dagiti mayor wenno dagiti maseknan a local government unit dagitoy.
Kunana nga iti biang dagiti OFWs ket ti Overseas Workers Welfare Administration (OWWA) wenno dagiti employer da ti mangbirok ti transportasyon dagitoy nangruna nu nakarehistro da iti nasao nga ahensya.
Inbatad na a saan a mabalin ti barangay ken home quarantine nu diket masapul nga agtalinaed dagitoy kadagiti quarantine facilities.
Inlawlawag na a dagiti agprobproblema a kaprobinsyaan wenno dagiti distressed OFWs ket mabalin da laeng nga ikontak iti facebook page ti PGIN wenno ni Governor Manotoc tapno matulungan dagitoy.
Innayon na a no saan da nga agprobproblema pay laeng iti panagawid ket agtalianed da pay laeng iti ayan da.
Kabayatanna, inbatad ni Gov. Manotoc a dagiti simmangpet iti border a saan a naipakaammo ket masapul nga aprobaran pay laeng dagiti mayor da tapno mapastrek dagitoy.
