LAOAG CITY – Nagyaman ni House Speaker Ferdinand Martin Romualdez ti pangipatungpal ni Finance Secretary Ralph Recto nga ibaba ti taripa iti bagas tapno bumaba met iti P50 kada kilo iti presyo kadagiti merkado.
Segun ken ni Romualdez, daytoy ket maysa kadagiti wagas tapno maalay-ayan ti kinarigat babaen ti panagibaba iti presyo.
Inlawlawag ni Romualdez, a ti panggep a pannakakissay ti taripa ket tapno mataming ti nangato a presio ti bagas a gapuanan dagiti mananggundaway a negosiante, epekto ti El Niño, ken nangato a presio iti international market.
Iti laksid daytoy, impanamnama ni Romualdez nga agtultuloy nga umawat dagiti mannalon iti tulong babaen ti Rice Competitiveness Enhancement Fund (RCEF) manipud iti masingir a buis a maibasar iti Republic Act 11203 wenno iti Rice Tariffication Law
