LAOAG CITY – Inbatad ni Dr. Charito Malicad, ti Information Officer ditoy ciudad ti Laoag a posible a mangrugi intono 2022 ti panagbakuna kontra covid-19 dagiti agtawen ti 5 agingga iti 11.
Segun kenni Malicad, addan ti pannakisarita na kenni Dr. Roel Bobis iti Department of Health – Regional Office no sadinno ket agur-uray da met ti mandato ti gobierno national tapno mabakunaan dagiti ubbing iti nasao nga age group.
Nupay kasta, kunana nga awan pay ti dinakamat ti DOH a petsa ti posible a pannakairugi ti panagbakuna.
Iti agdama, inbatad na nga adda pay ti lima ribo nga ubbing nga agtawen ti 12-17 nga agur-uray iti bakuna ken daytoy ti rason nga inpalubos da ti walk-in usar ti Pfizer vaccine.
