LAOAG CITY – Rugyanen ti House Committee on Justice ti panagdengngeg iti uppat a verified impeachment complaints kontra ken ni Vice President Sara Duterte intono bigat, Marso 2, 2026.
Segun ken ni Batangas Rep. Gerville “Jinky Bitrics” Luistro, chairman ti nasao a komite, ti panagdengngeg ket maiwayat manipod Marso 2 agingga iti Marso 4 no sadinno a nakatutuk daytoy iti panangtingiting no adda ti umdas a form ken substance dagiti reklamo.
Inlawlawag ni Luistro nga usaren ti komite ti kapada a proseso ken pagibasaran usar dagiti immuna a reklamo kontra ken ni Presidente Ferdinand Marcos Jr. a na-dismiss iti napalabas a tawen.
Innayon na a dagiti kangrunaan a pagibasaran ti impeachment ket ti alegasyon a saan nga umiso ti panangusar ti P612.5 milyon a confidential funds iti Office of the Vice President ken ti Department of Education, karaman dagiti panaglabsing iti Konstitusyon kas ti graft, panagpasuksuk ken saan a mailawlawag a kinabaknang.
Karaman pay kadagiti reklamo ti betrayal of public trust gapu iti saan a panangbigbig iti oversight ti Kongreso ken dagiti maipagarop a pangta kontra iti biag da Presidente Marcos Jr., First Lady Liza Araneta-Marcos, ken dati nga Speaker Martin Romualdez.
Segun ken ni Luistro, maipaayan ti gundaway ti bise presidente nga agsungbat kadagiti akusasyon kas paset ti karbengan na iti due process.
