LAOAG CITY – Inlawlawag ni Dr. Joseph Adaya iti City Health Office ditoy siudad ti Laoag ti panaghome quarantine dagiti kapamilya ni IN-C135 a nagpositibo iti covid-19 iti Brgy. 5 ditoy siudad.
Segun ken ni Adaya, adda dagiti sumagmamano a rason nga inkonsiderar da sakbay a naipalubus ti panaghome quarantine dagiti nagpositibo a kamapilya ni IN-C135.
Inbatad na a maysa ditoy ket ti humanitarian reason agsipod ta marigatan nga agtalinaed iti quarantine facility ti nagpositibo a senior citizen ken marigatan a magna idinto a ti maysa ket PWD.
Mainaig iti daytoy, kuna na a maysa pay a kinita da ket ti pagtaengan a pagtalinaedan da wenno ti mapagbalin nga isolation facility dagitoy.
Segun kenkuana, nakita da a mabalin a pagyanan dagiti pasyente ti pagtaengan agsipod ta addaan daytoy ti extension.
Inbaga na a dagiti nagpositibo ket nagtalinaed iti extension ti balay idinto a dagiti nagnegtaibo a kapamilya da met laeng ket isu ti adda iti main house.
Inbunnag ni Adaya a nu pay adda iti maymaysa a compound dagiti maseknan ket saan da a makapagdedenna agsipod ta adda dagiti nakabantay a kameng ti BHERTS ken pulis.
Kuna na a naiget ti pannakamonitor dagitoy ken saanda a pulos a mapalubusan a rumuar.
Maipalagip a dagiti nagpositibo a kapamilya ni IN-C135 ket ni IN-C154, agtawen ti 44 a babai, ni IN-C155 nga atawen ti 15 a lalaki ken ni IN-C156 nga agtawen ti 76 a baket.
