LAOAG CITY – Mapaigetan ti pannakasita dagiti motorsiklo nga addaan ti lubbon nga agbiyahe ditoy siudad ti Laoag.
Segun kenni Mr. Edgar Agustin, team leader ti team Alpha iti traffic aide ditoy siudad ti Laoag, sitaen da dagiti maseknan agsalungasing iti napatungpal a pammilin seknan ti pananglapped ti panagwaras ti corona virus disease.
Kuna na a balakadan da nga umuna ti maseknan nga agiturturong ti motorsiklo nga addaan ti lubbon no masita ngem iti sumaruno a panagsalungasing na iti pagalagadan ket maipaayanen ti ticket.
Inlawlawag ni Agustin a ti panangbalakad da dagiti maseknan a motorista iti umuna a gundaway ket tapno awanen ti rason a saan da a sumurot gapu ta maticketan da iti pananglabsing da kadagiti measures nga inpatungpal ti gobyerno.
Mainaig iti daytoy, masita pay dagiti aggandat nga agpasada kalpasan a naipatungpal ti pammilin a maipawil pay laeng ti panagbiyahe dagiti pampubliko a lugan tapno malappedan ti panagwaras ti COVID-19.
Innayon ni Agustin nga iyuray da ti pammilin ti hepe tapno isu iti suruten da nga ipatungpal.
