LAOAG CITY – Maipawil nga agisuot dagiti empleado ti gobierno kadagiti arwaten nga adda ti nakatatak a nagan dagiti kandidato kabayatan ti kampanya para iti Midterm elections.
Daytoy ti inbatad ni Atty. Julius Balbas, ti Commission on Election Officer ditoy ciudad ti Laoag.
Kuna ni Balbas a daytoy ket maibasar iti nagbalin a ruling iti Korte Suprema ken Department of the Interior and Local Government (DILG).
Inlawlawag ni Balbas a ti panangirakurak ti opinton ti maysa nga empleado maipanggep iti pulitika ket maipalubos, ngem no direkta a manggutigot kadagiti tattao tapno ibotos dagiti kandidato ket naiget a maipawil.
Innayon na a daytoy ket maibilang a direkta a panangikampanya kadagiti kandidato.
Mainaig iti daytoy, kuna pay ni Balbas a maipawil kadagiti empleado ti gobierno ti sumurot a mapan agkampanya.
Nagballaag ni Balbas a no adda dagiti empleado ti gobierno a mapaneknekan a naglabsing iti pagalagadan ket mapatawan ti pannusa kas maibasar iti civil service rules.
