LAOAG CITY – Inaprobaran ti Sangguniang Panlalawigan ti kiddaw ni Senior Board Member Rafael Medina maipapan iti pannakakanselar ti panagisuotda ti long sleeves kabayatan ti regular session dagitoy.
Daytoy ket kalpasan ti mapaspasaran a kinabara ti panawen ken gubuay iti El Niño phenomenon.
Segun ken ni Vice Gov. Cecilia Araneta Marcos, ti Presiding Officer ti hunta probinsial, babaen iti daytoy ket komportable dagiti padana nga agpanpanday linteg nga agatendar iti regular session nangruna ket bumarbara ti paniempo gapu iti panawen ti kalgaw.
Inbatadna a gapu iti daytoy a nailungalong ket mapalubusan pay laeng a temporario nga agbado dagitoy ti short sleeves.
Inlawlawagna a namunganayan ti panagkiddaw ni Bokal Medina ket gapu iti mairekrekord nga extreme heat index a maibilang a danger level wenno napeggad iti salun-at daytoy.
Innayonna a ti nasao nga addang dagiti agpanpanday linteg ket epektibo agingga nga agngudo ti summer season.
