Namnamaen ti Bangko Sentral ng Pilipinas (BSP) nga umabot iti baet ti 7.1 agingga 8.1 a porsiento ti inflation para iti bulan ti Oktubre ita a tawen.
Basar iti report nga inparuk-at ita nga aldaw, Oktubre 30, posible nga umabot iti nadakamat a rate ti inflation gapu iti panagngato ti presio ti petrolio iti pagilian, singir iti kuriente ken plete.
Nupay kasta, manamnama met a kumapuy daytoy gapu iti panagbaba ti presio ti kangrunaan nga agricultural products kas ti nateng, karne, bagas ken ikan gapu iti umdas a suplay.
Gapu iti daytoy, inpakaammoda nga agtultuloy a pokusan ti Bangko Sentral ng Pilipinas ti panagbantay kadagiti datos, pakairamanan pay iti pasamak iti Middle East ken dagiti manamnama nga epektona daytoy iti ekonomia ti pagilian.
Maipalagip nga immabot iti 7.2 a porsiento ti inflation idi Setiembre.
Kabayatanna, no umabot ti 8.1 a porsiento ti inflation iti bulan ti Oktubre, mairekord daytoy kas kangatoan nga inflation rate iti uneg ti tallo a tawen manipud idi immabot iti 8.6 a porsiento ti inflation ifi Pebreo 2023.
Naikeddeng pay a mangiparuk-at ti Philippine Statistics Authority (PSA) ti opisial a datosna iti inflasion para iti bulan ti Oktubre inton Nobiembre 5.
