LAOAG CITY – Inadmitir ti Human Resources Manager ti Kingdom of Jesus Christ (KOJC) ni Pastor Apollo Quiboloy a ni Marissa Duenas a nangiwayatda ti sinsinan a panagkasar idiay California.
Nangipila ti guilty plea iti kaso a conspiracy tapno allilawen ti Estados Unidos ni Duenas kasukat ti nababbaba a sentensia.
Kimmanunong ti United States Attorney’s Office nga ibasura dagiti dadduma pay a kaso a karaman ni Duenas.
Ti plea agreement ket napirmaan idi Lunes idiay Estados Unidos ni Duenas ken ti abugadona a ni John Littrell.
Basar iti 16 a panid a dokumento, inallukoy ni Duenas dagiti dadduma pay a makitinnulag tapno agaramid ti peke a panagkallaysa idiay Amerika.
Iti babaen ti katulagan, gagem a mapagtalinaed ti takder iti imigrasyon ti Estados Unidos dagiti miembro ti Kingdom of Jesus Christ iti babaen ti panangiyurnos ti “sham marriages” kadagiti dadduma pay a miembro ti Kingdom of Jesus Christ a residente ti Estados Unidos.
Ni Duenas ket agpada nga akusado ni Maria De Leon a maitudtudo a nangilakad kadagiti peke a dokumento para kadagiti miembro ti simbahan.
Ni Quiboloy ket wanted ti Federal Bureau of Investigation gapu iti maipagarup a pannakipasetna iti labor trafficking scheme a nangikabil kadagiti miembro ti simbaan idiay Estados Unidos iti babaen kadagiti peke a visa.
Nupay kasta, naiget a naglikudan ni Quiboloy dagiti maiyak-akusar kontra kenkuana.
