LAOAG CITY – Nagpalagip ti Commission on Elections kadagiti kandidato para iti May 12 midterm elections nga ita nga aldaw ti maudi a mapalubosan dagitoy nga agkampania.
Inbatad ni Commission on Elections Chairperson George Erwin Garcia, naiget nga ipawil ti linteg ti panagkampania mangrugi inton bigat wenno iti bisperas ti eleksion, Mayo 11, aldaw ti Domingo agingga iti mismo nga aldaw ti eleksion.
Mainaig iti daytoy, inlawlawag ni Garcia a maipatungpal pay inton bigat, aldaw ti Domingo ti liquor ban.
Kunana a no asinoman ti aglabsing iti liquor ban ket mabalin a sumango iti pannusa a pannakaibalud ti agingga iti innem a tawen.
Naammoan nga exempted met iti liquor ban dagiti hotel, resorts, restaurants ken dadduma pay nga establishimento nga accredited ti Department of Tourism (DOT) kas tourist-oriented ngem kasapulan nga addaanda ti immunan a written authority.
Kabayatanna, karaman pay ti panagpallot a naiget a maipawil ken nasken nga isardeng pay laeng.
