LAOAG CITY – Saan a masinunuo ni Atty. Jether Corpuz, top 12 ti 2022 Bar Examinations ti pangipanan na ti ragsak na gapu iti nagbalin a resulta ti eksaminasyon.
Segun ken ni Corpuz, adda ti supli dagiti amin a rigat na bayat ti panagbasa na iti abogasya agingga a nag-review ken dimmalan iti Bar Examination.
Mainaig iti daytoy, inpakaammo ni Corpuz a dagiti nagbalin a sikreto na tapno agballigi ket umuna nga aramiden na iti inaldaw ti debosyon wenno oras iti panagkararag.
Kuna na a malaksid iti daytoy ket apaman nga adda ti pigsa ti bagi na nga agadal ket saan nga agsardeng nga agbasbasa tapno awan ti masayang nga oras ngem saan na nga ipilit nu awan iti kondisyon ti panunot na.
Inbatad na a dakkel a tulong ti panangdisiplina iti bagbagi kageddan ti panangipaulo amin nga impormasyon a mabasbasa na maipanggep iti eksaminasyon ken panagbalin nga abogado.
Kabayatanna, inpakaammo ni Corpuz a sipud natapugan na ti maikadua a tawen na iti College of Law ket inrugi nan ti ag-review para iti Bar Examination.
Nu pay kasta, inbunannag ni Corpuz a kangrunaan a mangibababba ti kompiyansa na sakbay ti eksaminasyon ket nakapsot iti written exam, ti kadakkelan a paset ti Bar Examination.
Ni Corpuz ket immunan a nagturpos kas cum laude iti kurso a Bachelor of Science in Information Technology iti AMA Computer College ditoy siudad ti Laoag sakbay a simrek iti college of law iti Mariano Marcos State University ken nagturpos idi Hunyo itay napan a tawen.
Iti agdama ket agserserbi ni Corpuz kas junior associate iti maysa a law firm iti Metro Manila.
Kabayatanna, ti Mariano Marcos State Univeristy ket isu met ti No. 5 Top Performing Schools iti nasao nga eksaminasyon kalpasan a nakagun-od ti 75% passing rate nu sadino a siyam kadagiti 12 a nageksamin ket nakapasa.
