LAOAG CITY – Binabalaw ni Kamanggagawa Party-list Rep. Elijah “Eli” San Fernando ti panagkedked ti Independent Commission for Infrastructure (ICI) nga iruar ti records dagiti napalabas a panagdengngeg daytoy kabayatan ti panangtalantanna pay laeng ti pagannurotan para iti plano nga i-livestream ti proceedings mangrugi inton sumaruno a lawas.
Para ken ni San Fernando, ti panangpili ti Independent Commission for Infrastructure nga ilimed iti publiko nga imbes nga itandudo ti transparency ken panangsungbat ket senyales ti cover-up wenno adda ti kalkalubanna daytoy.
Inpetteng ni San Fernando no apay nagadu ti rason ken marigrigatan unay ti Independent Commission for Infrastructure nga ipakita iti publiko ti proceedings-da ket saan met a ti transparency ti rason tapno makompromiso ti imbestigasion daytoy mainaig iti maanomalya a flood control projects.
Karit ni San Fernando iti Independent Commission for Infrastructure, no awan ti protprotektaranna ken kalkalubanna ket lukatanen daytoy iti publiko dagiti amin a record ken hearing.
Innayonna a no saan a maaramid ti Independent Commission for Infrastructure ket nasaysayaat a tumalaw laengen daytoy gapu ta nayon a gastos laeng kadagiti mangmangged ken ordinaryo a Pilipino ti operasion ti maysa nga awan ti serserbina nga opisina kas ti Independent Commission for Infrastructure.
