LAOAG CITY – Indeklara dagtii doktor ti epidemia iti panagkonsumo ti arak ken tabako pakairamanan ti panagusar ti vape gapu iti panagadu kadagiti agtutubo a maadik iti daytoy.
Segun ken ni Dr. Hector Santos Jr., Presidente ti Philippine Medical Association a ti panagsigarilio ti nagtalinaed a kangrunaan a makaigapu ti preventable diseases ken pannakatay iti intero a lubong.
Inbatad ni Santos, ti panagsigarilio ket dakkel ti peggadna iti cardiovascular complications kas ti stroke ken sakit iti puso a kangrunaan a rason ti pannakatay kadagiti lallaki ken dagiti babbai.
Kunana a ti e-cigarettes ken vape, nga ipagarupda nga healthier alternative iti sigarilio ket agbalbalin a popular kadagiti agtutubo.
Nupay kasta, imbes a makapasayaat ket ad-adda pay a makaala ti sakit iti salun-at.
Iti datos manipud iti Department of Science and Technology — Food and Nutrition Research Institute (DOST-FNRI) idi 2021, sumurok 37 a ribu nga agtutubo ti agus-usar ti vape. Ngimmato pay daytoy ti sumurok 1,000% wenno 423 a ribu idi 2023 laeng.
Inlawlawag met ni Dr. Corry Avanceña ti Philippine Academy of Pediatric Pulmonologists, rimmuar iti panagadalda nga ad-adu nga agtutubo ti nangrugi a nagusar ti vape maidasig iti nag-enroll iti Alternative Learning System (ALS) ti Department of Education (DepEd). Mangipasimudaag daytoy nga arig nga ad-adda nga adda ti access pay dagiti agtutubo iti vape industry no idasig iti Department of Education.
Kabayatanna, ti panagkonsumo met iti arak ket naobserbaran a makaapektar kadagiti agtutubo.
Naammoan a ti bilang dagiti agtutubo nga agin-inum ket dimmoble iti uneg laeng ti dua a tawen wenno manipud iti 1.06 milyon idi 2021 ket nagbalin a 2.21 milyon idi 2023.
