LAOAG CITY – Binallaagan ni United States Secretary of States Marco Rubio nga agbalin a delikado ti precedent no mapalubusan a kontrolen ti Iran ti panagdalyasat dagiti barko iti Strait of Hormus gapu ta mabalin a maulit daytoy iti sabali a paset ti lubong , karamanan ti Southeast Asia.
Iti taripnong ti ASEAN Foreign Ministers, inbatad ni Rubio nga awan karbengan ti Iran a kontrolen ti napateg nga international waterway ken agsingir wenno agpangta kadagiti barko a dumaldalyasat ditoy.
Inrakurak met dagiti foreign minister ti ASEAN ti panagdanagda iti kumarkaro a tension iti baet ti United States ken Iran no sadinno ket kiddawda nga isardengdan ti rinnupak.
Impagentegetda a natalged ken agtultuloy a panagdalyasat iti Strait of Hormuz gapu ta napateg daytoy iti negosio, suplay ti enerhia ken makan.
Kuna ni Rubio a nakasagana ti United Stated a makikoordinar iti ASEAN tapno masolbar ti posible nga epekto ti problema iti suplay ti enerhia ken presio ti langis.
Kabayatanna, sakbay iti ASEAN meeting, nakitaripnong ni Rubio ken ni Foreign Affairs Secretary Ma. Theresa Lazaro no sadinno ket binigbig ti Pilipinas iti nagballigi a panag-host-na ti ASEAN meetings.
