LAOAG CITY – Nakapsot ti panaglako ti torotot iti Laoag City Public Market and Commercial Complex sumagmamano nga oras sakbay ti panangsarabo ti baro a tawen.
Segun ken ni Mr. Mohammed Rampatan, patienna a daytoy ket gapu iti kinaadu dagiti padana met nga aglaklako ti torotot nga agpapada pay dagitoy ti disenio dagiti ilaklakoda.
Inbatadna a bagsak presio payen ti pinamay-anda tapno laeng maipaibosda dagiti ilaklakoda a torotot.
Kunana a nangrugi iti 50 a pisos iti pananglakoda iti kabassitan a torotot ngem itan ket adda ti 3 for 100.
Inlawlawagna nga agay-ayam met ti presio dagiti kadakkelan a torotot iti 50 a pisos agingga iti 150 a pisos.
Kabayatanna, dupudop dagiti umili a nagturong kadagiti paglakoan ti prutas.
