LAOAG CITY – Inpakaammo ni Mr. John Teodoro, ti General Manager ti Ilocos Norte Water District nga adda ti epekto ti suplay ti danum iti mapaspasaran a panagngato ti temperatura gapu iti kinabara ti panawen.
Nupay kasta, inpasingkedna nga ar-aramidenda amin ti kabaelanda tapno awan ti mapasamak a panagpukaw ti suplay ti danum kadagiti consumers ditoy probinsia.
Inbatadna a gapu iti agdama a kasasaad ti panawen ket mangiestablisarda ti baro a pangalaanda ti danum iti Brgy. 29 ditoy siudad ti Laoag a manamnama a mangrugi daytoy a proyekto ita a lawas tapno dagus a mausar inton sumaruno a lawas.
Inlawlawagna a normal operation ti Ilocos Norte Water District iti baet ti pangta ti El Niño phenomenon no sadino ket makitana nga adda ti umdas a suplay ti danum para kadagiti maseknan a consumers.
Inpalgakna nga adda met dagiti gundaway a saanda a makontrol kas ti panagpukaw ti serbisio ti kuryente nga isu ti mangitunda ti panagawan ti danum.
Kunana nga adda met ti nakasagana a power facility a mausar no adda dagiti saan a mapakpakadaan a parikot.
Innayonna a maysa pay kadagiti rason ti panagpukaw ti danum ket dagiti pannakadalapos dagiti linya wenno tubo ti Ilocos Norte Water District gapu kadagiti maisaysayangkat a proyekto kas ti road widening project.
