LAOAG CITY – Mannarimaan ti panagpatrolya dagiti barko ti Philippine Coast Guard a naibaon a mangsukat iti BRP Teresa Magbanua iti Escoda shoal tapno mamonitor ti lugar ken siguraduen nga awan ti reclamations ken dadduma pay nga illegal activities idiay.
Segun ken ni National Security Council spokesperson Assistant Director General Jonathan Malaya, maisupadi daytoy iti immunan nga inpakaammu ti dadduma a sektor nga insuko ti Pilipinas ti claim na iti nasao a paset ti baybay kalpasan nga na-pull out ti BRP Teresa Magbanua itay nabiit.
Sitatalged met a kinuna ni Malaya a saan a nag-withdraw wenno inted ti Pilipinas ti Escoda shoal iti China no di ket adda laeng ti repositioning.
Inlawlawag pay ti opisyal ti National Security Council a kasapulan dagiti Coast Guard personnel a naglugan iti BRP Teresa ti supply reprovision kasta met ti kasapulan a mangtarimaan kadagiti nadadael ti barko kalpasan ti namitlo a daras a pannakadungparda kadagiti barko ti China Coast Guard idi napan nga Agosto.
Kinunana pay a nalawlawaganen ni National Security Adviser Eduardo Año a mangibaon iti relief ship para ken ni BRP Teresa Magbanua iti Escoda shoal.
