LAOAG CITY – Pinagtignay ti Department of Environment and Natural Resources (DENR) dagiti nagduduma a regional office, line bureau ken field unit-na tapno papigsaen ti panagsagsagana kontra iti El Niño.
Basar iti state weather bureau, mabalin pay a pumigsa ti El Niño nga agbalin a very strong event sakbay nga agleppas ti tawen ken manamnama pay ti panagtultuloyna agingga iti umuna a paset ti tawen 2027.
Mainaig iti daytoy, karaman kadagiti panagtignay ti DENR ket ti pannangipasdekna ti kanayunan pay a pagal-alan ti danum, pananggutigot iti publiko nga agtipid iti danum, panangtagiben kadagiti watersheds ken kabakiran, panangliklik kadagiti forest fire ken panangpatalinaed ti kinatalged kabayatan ti nakaro a pudot.
Segun iti ahensia, importante ti koordinasion dagiti lokal a gobierno, ken ti naiget a pannagipatungpalda ti water conservation.
Kabayatanna, kas paset ti panagsagsagana ti ahensia, nangipasdek ti DENR ti water impounding system structure ken rainwater harvesting system tapno maadaan ti kanayunan a suplay ti danum.
Pinapigsa pay dagiti regional office ken attached agency ti DENR ti water conservation, watershed monitoring, panangtagiben iti ecosystem ken kadagiti heat-safety measures.
Ti nasapa a panagsagsagana ti DENR iti El Niño, ket paset ti panagsungbat iti pammilin ni Presidente Ferdinand Marcos Jr. kadagiti ahensia ti gobierno para iti nasapa a panagsagsagada para iti manamnama a dry spell.
