LAOAG CITY – Naaprobaran iti maikadua ken maudi a panakaibasa ti Draft Provincial Resolution No. 2024-05-289 maysa a resolusion a mangipaay ti bileg kenni Governor Mathew Marcos Manotoc a mangidonar iti kasapolan nga equipment para iti panakapadur-as ken panakapasayaat iti Vintar District Hospital.
Daytoy ket indasar ni Sangguniang Panlalawigan Member Medeldorf Gaoat ti Commitee on Health bayat iti naiyuswat a regular session iti Hunta Probinsial .
Basar kenni Gaoat, mangipaay ti Gobierno Probinsial kadagiti equipment a kasapulan iti nasao a hospital, no sadinno a manamnama a maidonar ti maysa a unit a Blood Extraction Armchair/Plebetomy.
Malaksid iti daytoy, ket manamnama pay a maipaay ti maysa a unit ti Cardiotocography Machine para kadagiti masikog nga agturong iti nasao a balay pagagasan.
Ti maysa a Blood Extraction Armchair/Plebetomy ket aggatad iti 54,000 a pisos ken iti met maysa a unit a Cardiotocography Machine ket 82, 555 a pisos.
Malaksid kadagiti equipment ket gagem met ti nadakamat nga ospital nga ag-hire iti mang-operar kadagitoy.
Kabayatanna, mamati ni Gaoat a makatulong ti nasao a ganuat tapno matulongan dagiti maiserserrek a pasiente iti Vintar District Hospital.
